Жәнібек ӘшімжановАллаға шүкір барыңа 2021 (поэзия)

Сағына түсем, сары ала күздей сарылып,
Кеш түссе болды, сені іздеп кетеді сары үміт.
Сары үмітім көрінсе саған жарқырап,
Тірліктен анау бір сәтке болсын арылып,
Хабарлас жаным, хабарлас жаным сағынып!

Кеш батты тағы, қайдасың қайда жоғалдың,
Іздетпеді ме, қызарып батқан анау күн?
Сені іздеп, ботам, сары үміт кетті қыр асып,
Мен болсам, жаным, бөлмеме тағы қамалдым.
Өзіңдей ботам, жаныма дауа болар кім?

Өзіңді жаным, сағына берем сағына,
Көзіңді бота көремін қашан тағы да?
Нұрыңды сепші, күлімдеп келіп жаныма,
Айналшы ботам, мәңгілік менің бағыма!
Аллаға шүкір, Аллаға шүкір барыңа!