Shavkat ZulfiqorKetyapman

Aro g'amni bir o'zim tortibgina ketyapman
Yelkamga ola xurjin ortibgina ketyapman
Yaxshi - yomon so'zimga o'zim do'stman o'zimga
Bergan rizqing ko'zimga surtibgina ketyapman

Nomaqulning nonini
Olmadim hech yonini
Duch kelgan yomonini
Turtibgina ketyapman

G'arib jonim ozorda
Bir kun yotar mozorda
Umrim hayot bozoda
Sotibgina ketyapman

Qorni och, qorni to'qqa
Bosh egsa boru - yo'qqa
O'zimni o'tdan cho'qqa
Otibgina ketyapman

Umrim oqar soydayin
Omonat bir joydayin
Qaytib chiqmas oydayin
Botibgina ketyapman

Zamon siylar zo'rini
Berib qo'ysa to'rini
Peshonamning sho'rini
Totibgian ketyapman

Har ertayu - kechimda
Yakun izlab yechimga
Dardimni ich - ichimga
Yutibgina ketyapman

Aravamni bir o'zim tortibgina ketyapman
Yelkamga ola xurjin ortibgina ketyapman
Yaxshi - yomon so'zimga o'zim do'stman o'zimga
Bergan rizqing ko'zimga surtibgina ketyapman