Эржан БайкуловАйылдык кыз

Бошонуп борбор жакка жайылдык биз,
Боенуп кошо келген айылдык кыз.
Көздөргө көз айнекти таккан менен,
Көөдөндө күндү сүйгөн айылдыкпыз.

Күзүндө шаарга келген дайындыксыз,
Кыш бүтүп, тыңыгандай айылдык кыз.
Ашыгып шаардыктардай жүргөн менен,
Шашпаган жайбаракат айылдыкпыз.

Чыныдай чындык айтам айылдык кыз,
Чий така кийген менен айылдыксыз.
Чым баспай асфальт жолго чыккан менен,
Чынында, чаңды сүйгөн айылдыкпыз.

Чын айтам чычалаба айылдык кыз,
Чыканак күйүп күнгө айылдыксыз.
Чылымды шаардыктардай чеккен менен,
Чынында, чыныгы биз айылдыкпыз!