Аманкелді СатиевАйым қызым

Тұла бойым тұңғышым-Айым қызым,
Тусын әркез оңынан айың қызым.
Бір сен үшін ата-анаң әрқашанда,
От пен суға түсуге дайын қызым, Айым қызым...

Алла берген асылым алтынымсың
Ақ жүректі ақ көңіл жарқынымсың.
Көз алдымда құлпырған қызғалдығым,
Ана деген сүйкімді бал тілімсің.

Көп күттірген көз нұрым, аңсағаным,
Иіскесем басылар шаршағаным.
Балдай тәтті тіліңмен былдырлаған,
Қылығыңа сүйсініп, тамсанамын.

Өмірімнің мәнісің Айым қызым,
Көңілімнің сәнісің Айым қызым.
Аманаты Алланың ақ періштем,
Аман жүрші алтыным Айым қызым.